2011年11月1日 星期二
2011年5月10日 星期二
臺灣話(2011年5月)
一位阿伯:
溪湖的火車,這馬罕咧共坐著矣,較早想講拄踮員林有五分仔車,攏佮載學生仔攏去員林讀冊,這mái 誠久無、無、無矣,無駛員林線。
Tsi̍t uī a-peh:
Khe-ôo ê hué-tshia, tsit-má hán leh kā tsē tio̍h ah. Khah-tsá siūnn kóng tú tiàm Uân-lîm ū gōo-hun-á-tshia. Long kah tsài ha̍k-sing-á long khì Uân-lîm tha̍k-tsheh. Tsit-mái tsiânn-kú bô, bô, bô-ah. Bô sái Uân-lîm-suànn.
一位阿姆:
足歡喜的(按怎講唅?),哇,攏毋捌坐著矣,誠久攏毋捌坐著矣,超有五十年毋捌坐著,(啊這遍咧?)這擺坐一下歡喜甲,我八十幾歲 ,從阮阮足少歲,蹛佇糖廠邊仔,阮較早蹛佇林內糖廠,虎尾彼个林內糖廠,這馬來遮攏坐這,毋捌坐,誠久毋捌坐矣。足歡喜的。
Tsi̍t uī a-ḿ:
Tsiok huan-hí ê( án-tsuánn kóng - -hannh?) Ua, lóng m̄-pat tsē tio̍h ah. Tsiânn kú lóng m̄-pat tsē tio̍h ah. Tshiau ū gōo-tsa̍p nî m̄-pat tsē tio̍h.(Ah tsi̍t-piàn leh?). Tsit pái tsē tsi̍t ê huann-hí kah. Guá peh-tsa̍p-kuí huè mah. Tsîng gún-gún tsiok tsió huè , tuà tī thn̂g-tshiáng pinn-á. Gún khah tsá tuà tī Lîm-nâ thn̂g-tshiáng. Hóo-bué hit ê Lîm-nâ thn̂g-tshiáng. Tsit-má lâi tsiah lóng tsē tse, m̄-pat tsē, tsiânn kú m̄-pat tsē ah. Tsiok huann-hí ê.
參考資料
彰視, 老人春季遊 乘坐小火車回憶年少,尤宏源,溪湖,2011-05-08
http://news.sdtv.com.tw/News_detail.html?sn=15123&p=1#news_top
2011年4月22日 星期五
臺灣話(2011年4月)
彰視新聞2011/04/27 尤宏源 溪湖報導
臺中區農改場場長 張致盛表示:「因為溫室葡萄雖然是一个”收益”較懸的產業,但是肥料嘛佔真大的成本,阮利用這擺合理化施肥,佇遮做實際的觀摩乎?不但葡萄的生長相當的好,而且伊的品質會當提昇,上重要會使節省咱農民的肥料成本,一分地會使節省六百外箍,佇咱彰化規个共鬥起來乎?咱彰化縣干焦溫室葡萄會使省百外萬的肥料錢。」
Tâi-tiong-khu Long-kái-tiûnn tiûnn-tiúnn Tiunn Tì-sīng piáu-sī: In-uī un-sik phû-tô sui-jiân sī tsit ê “Sok ì” kah kuân ê sán-gia̍p, tān-sī puî-liāu mā tsiàm tsin tuā ê sîng-pún. Gún lī-iōng tsit-pái ha̍p-lí-huà si-puî. Tī tsia tsò si̍t-tsè ê kuan-môo—honnh. Put-tān phû-tô ê sing-tióng siong-tong ê hó. Jî-tshiánn i ê phín-tsit ē-tàng thê-sing. Siōng-tiōng-iàu ê-sái kiat-síng lán long-bîn ê puî-liāu sing-pún. Tsi̍t hun tē ē-sái kiat-síng la̍k-pah-guā khoo. Tī lán Tsiong-huà kui ê kā tàu khí--lâi honnh, lán Tsiong-huà-kuān kan-nā un-sik phû-tô ē-sái síng pah-guā-bān ê puî-liāu tsînn.
---------------------------------------------------
彰視新聞2011/04/25 賴清隆伸港報導
福安宮主委曾水松講:「媽祖這个契囝,啊非常的濟,過去咧感覺有較少,這馬來愈來愈濟,咱這馬算幾若萬人,啊因為咧,這个契囝个就愛來媽祖,媽祖面前點香、跋桮,啊看欲予第幾媽來做這个契囝按呢。」
Tsiong-sī sin-bûn Khóo Sū-guân Uân-lîm pò-tō.
In-uī bô tsò kuán-lí; sóo-í m̄-nā bú-tsâng senn liáu tsin bái. Liân kin-tsio mā piàn sè jí ah. Tsú-lâng piáu-sī, tsí-iàu sī tsò hó ki-pún ê kuán-lí. Tsit kuá kin-tsio tiō ē uân-tsuân bô kāng-khuán. In-uī phín-tsíng tsin ti̍k-sû, uī tio̍h beh pó-tsíng. In mā ē-tàng tsiap-siū bîn-tsiòng lâi soh-tshú. Ta̍k-ke tsò-hué lâi tsò hó pó-tsíng ê kang-tsok.
佇 2011年4月26看三大有線電視網站了的記錄
---------------------------------------------------
彰視新聞許士源員林報導。 2011/04/21
因為無做管理,所以毋但母欉生了真䆀,連弓蕉嘛變細子矣,主人表示,只要是做好基本的管理,這寡弓蕉就會完全無仝款,因為品種真特殊,為著欲保種,怹嘛會當接受民眾來索取,逐家做伙來做好保種的工作。
Tsiong-sī sin-bûn Khóo Sū-guân Uân-lîm pò-tō.
In-uī bô tsò kuán-lí; sóo-í m̄-nā bú-tsâng senn liáu tsin bái. Liân kin-tsio mā piàn sè jí ah. Tsú-lâng piáu-sī, tsí-iàu sī tsò hó ki-pún ê kuán-lí. Tsit kuá kin-tsio tiō ē uân-tsuân bô kāng-khuán. In-uī phín-tsíng tsin ti̍k-sû, uī tio̍h beh pó-tsíng. In mā ē-tàng tsiap-siū bîn-tsiòng lâi soh-tshú. Ta̍k-ke tsò-hué lâi tsò hó pó-tsíng ê kang-tsok.佇 2011年4月25看三大有線電視網站了的記錄
---------------------------------------------------
Youtube youiou2001的白雪公主台語版
王子:是按怎命運會遮爾仔殘忍?我上無想欲看著的查某人,竟然遮爾仔拄好,踮遮去予我拄著,伊真正是非常的䆀,你講伊到底叫啥物名?
矮仔人:伊叫做白雪啦,雖然我嘛感覺伊誠䆀,但是你嘛莫講甲按呢!
Youtube youiou2001 ê Pe̍h-suat kong-tsú Tâi-gí-pán:
Ông-tsú:Sī-án-tsuánn miā-ūn ē tsiah-nī-á tsân-jím? Guá siōng bô siūnn beh khuànn tio̍h ê tsa-bóo-lâng. Kìng-jiân tsiah-nī-á tú-hó, tiàm tsia khì hōo guá tú tio̍h. I tsin-tsiànn sī hui-siông ê bái. Lí kóng i tàu-té kiò siánn-mi̍h miâ?
É-á-lâng: I kiò tsò pe̍h-suat lah. Sui-jiân guá mā kám-kak i tsiânn bái. Tān-sī lí mā mài kóng kah án-ne.
佇 2011年4月23看youtube影片了的記錄
---------------------------------------------------
無米樂的崑濱伯:
敬奉玉皇大帝大天尊,賜福遮眾弟子平安幸福、事業順序、五穀豐收、國泰平安、風調雨順、合境平安。
Bô bí lo̍k ê Khun-pin peh:
Kìng-hōng Gio̍k-hông Tāi-tè Tāi-thian-tsun. Sù-hok tsia tsiòng tē-tsú ping-an hīng-hok, sū-gia̍p sūn-sī, ngóo-kok hong-siu, kok-thài pîng-an, hong-tiau-ú-sūn, ha̍p-kíng pîng-an.
佇 2011年4月22看youtube影片了的記錄
---------------------------------------------------
無米樂的煌明伯:
較早咧飼牛彼陣乎,看著這个草是誠歡喜,講按呢這妥當矣,伊今仔日欲割七、八欉轉來予牛食,妥當矣。啊這馬看著這个草是足討厭。
"Bô bí lo̍k" ê Hông-bîng peh:
Khah- tsá leh tshī gû hit tsūn honnh. Khuànn tio̍h tsit ê tsháu sī tsiânn huann- hí,kóng án-ne tse thó-tòng ah. I kin-á- ji̍t beh kuah tshit peh tsâng tńg lâi hōo gû tsia̍h, thó-tòng ah. A tsit-má khuànn tio̍h tsit ê tsháu sī tsiok thó-ià.
佇 2011年4月20看youtube影片了的記錄
2011年1月7日 星期五
台灣高速鐵路
台灣高速鐵路會使簡稱台灣高鐵,是將臺北佮高雄相迵的高速鐵路系統,路線345.2公里長,時速是300公里,對臺北到高雄,一逝路干焦90分鐘,台灣高鐵是一个BOT案,本底預計2005年10月31通車,後來延一年,2007年1月5通車。
Tâi-uân Ko-sok Thih-lōo ē-sái kán-tshing Tâi-uân Ko-thih, sī tsiong Tâi-pak kap Ko-hiông sio-thàng ê ko-sok thih-lōo hē-tóng. Lōo-suànn 345.2 kong-lí tn̂g. Sî-sok sī 300 kong-lí. Tuì Tâi-pak kàu Ko-hiông, tsi̍t-tsuā-lōo kan-na 90 hun-tsing. Tâi-uân Ko-thih sī 1 ê BOT àn, pún-té ū-kè 2005-nî 10-gue̍h 31 thong-tshia, āu--lâi iân 1 nî, 2007-nî 1-gue̍h 5 thong-tshia.
Tshia-sin sī Ji̍t-pún-tsè ê 700T-hē Sin-kàn-suànn (新幹線 sinkansen) tiān-tshia.
車站
(南港) – 臺北 – 板橋 – 桃園 – 新竹 – (苗栗) – 臺中 – (彰化) – (雲林) – 嘉義 – 臺南 – 左營 – (高雄)。
(Lâm-káng) – Tâi-pak – Pang-kiô – Thô-hn̂g – Sin-tik – (Biâu-li̍k) – Tâi-tiong – (Tsiong-huà) – (Hûn-lîm) – Ka-gī – Tâi-lâm – Tsó-iânn – (Ko-hiông).
改寫閩南語維基:Tâi-oân Ko-sok Thih-lō͘ 原作者:Pektiong, Chùn-hiàn, A-giâu, Wdshu, LERK..等等
二二八事件
Jī-ji-pat Sū-kiānn (228 Sū-kiānn), piáu-bīn-siōng khuànn-khì-lâi sī tsi̍t-tîunn 1947 nî 2 gue̍h 27 huat-sing tī Tâi-pak ê kuann-bîn kiu-hun, sī kong-bē-kio̍k tsa-tsi̍p-uân tshú-tē tsáu-su hun sò ín-khí. M̄-koh, sū-kiānn ê pok-huat ū i puē-āu ê guân-im. Ki-pú-siōng ē-sái khuànn-tsò sī tsāi-tē ê tâi-uân-lâng kap kok-bîn-tsìng-hú phài-lâi tsiap-siu Tâi-uân ê guā-síng-lâng ê tsi̍t-tîunn tsok-kûn tshiong-thut. 228 Sū-kiānn ê huat-sing, tuì āu-lâi Tâi-uân tok-li̍p ūn-tōng ū tsin-tuā ê íng-hióng.
事件的經過
1947年2月27日,臺灣省專賣局的查緝員傅學通六人佮四个警察,佇臺北市南京西路的天馬茶房(現 此時的延平北路)頭前, 蹧躂賣私薰的四十歲寡婦林江邁,佇相諍的過程中,林婦人人予銃拍著頭殼流血,邊仔的查某囝嘛驚甲哭起來,看著的市民氣怫怫,煞共查緝員包起來,傅查緝員佮 做伙的人開銃警告,不幸誤殺拄好佇樓跤看鬧熱的市民陳文溪,掠狂的群眾佇彼暝隨時共警察局包起來,要求愛辦兇手,毋過攏無得著滿意的答案,第二工開始,臺 北市罷工、罷市,眾人向行政長官公署請願、示威,真不幸閣發生公署的衛兵開銃,造成傷亡,民眾的心情愈來愈激恨,著按呢,按三月初一起,暴發全島性的反抗政府事件。Sū-kiānn ê king-kè
1947 nî 2 gue̍h 27 ji̍t, Tâi-uân-síng Tsuan-bē-kio̍k ê tsa-tsi̍p-uân Pòo Ha̍k-thong (傅學通) la̍k lâng kap 4 ê kíng-tshat, tī Tâi-pak-tshī lâm-kiann-se lōo ê Thian-má Tê-pâng (Hiān-tshú-sî ê Iân-pîng-pak-lōo) thâu-tsîng, tsau-that bē su-hun ê sì-tsa̍p hè kuánn-hū Lîm Kang-māi (林江邁), tī sio-tsìnn è kuè-tîng-tiong, Lîm hū-jîn-lâng hōo tshìng phah-tio̍h thâu-khak lâu-hueh, pinn-a ê tsa-bó-kiánn mā kiann-ka khàu--khì-lâi. Khuànn-tio̍h ê tshī-bîn khì-phut-phut, suah ka tsa-tsip-uân pau-khì--lâi. Pòo tsa-tsip-uân kap tsò-hué ê lâng khui tshìng kìng-kò, put-hīng gōo-sat tu-hó tī lâu-kha khuànn-lāu-jia̍t ê tshī-bîn Tân Bûn-khe (陳文溪). Lia̍h-kông ê kûn-tsiòng tī hit mî sui-sî ka kíng-tshat-kio̍k pau-khì--lâi, iau-kîu ài pān hiong-tshíu, m̄-koh lóng bô tit-tio̍h muá-ì ê tap-àn. Tē jī kang khai-sí, Tâi-pak-tshī pā-kang, pā-tshī, tsìng-lâng hiòng Hîng-tsìng Tíunn-kuann Kong-sū (行政長官公署) tshíng-guān, sī-ui. Tsin put-hīng koh huat-sing kong-sū ê uì-ping khui-tshìng, tsò-sîng siong-bông, bîn-tsióng ê sim-tsîng lú-lâi-lú kik-hùn. Tio̍h án-ne, àn 3 gue̍h tshe it khí, po̍k-huat tsuân-tó-sìng ê huán-khòng tsìng-hú sū-kiānn.
一寡零星的暴動無算,遮的反抗事件會使講主要按兩大路線咧行:第一種是政治交涉路線;第二種是武裝抗爭路線,佇一方面,臺北佮其他所在的民意代表佮社會名流、士紳紛紛組成二二八事件處理委員會(簡稱處委會)佮行政長官陳儀協商、談判,而且對陳儀提出逮捕貪官廢除行政長官公署,實行自治,佇行政、司法、軍事各方面用臺灣人等等的要求,另外一面,佇臺中、嘉義、斗六、高雄、花蓮遮的所在,出現一寡民間力量開始收繳銃機、組民兵,用武力抗爭,中央上出名的是前臺共領袖謝雪紅佇臺中的27部隊。
Tsi̍t-kuá lân-san ê po̍k-tōng bô-sǹg, tsia-ê huán-khòng sū-kiānn ē-sái kóng tsú-iàu àn nn̄g-tuā lōo-suànn leh kiânn: Tē it-tsióng sī Tsìng-tī kau-sia̍p lōo-suànn; tē jī-tsióng sī Bú-tsong khòng-tsing lōo-suànn. Tī tsi̍t-hong-bīn, Tâi-pak kap kî-tha sóo-tsāi ê bîn-ì tāi-piáu kap siā-huē miâ-lîu, sū-sin, hun-hun tsoo-sîng Jī-jī-pat Sū-kiānn Tshú-lí Uí-uân-huē (kán-tshing Tsú-uí-huē) kap Hîng-tsìng tióng-kuann Tân Gî (陳儀) hia̍p-siong, tâm-phuànn, jī-tshiánn tuì Tâi Gî thê-tshut tāi-póo tham-kuann huì-tû Hîng-tsíng-tióng-kuann Kong-sū, si̍t-hîng tsū-tī, tī hîng-tsìng, su-huat, kun-sū kok hong-bīn iōng Tâi-uân-lâng tíng-tíng ê iau-kîu. Līng-guā tsi̍t-bīn, tī Tâi-tiong, Ka-gī, Táu-la̍k, Ko-hiông, Hua-liân tsia-ê sóo-tsāi, tshut-hiān tsi̍t-kuá bîn-kan li̍k-liōng khai-sí siu-kiáu tshìng-ki, tsoo bîn-ping, iōng bú-li̍k khòng-tsing. Tiong-ng siōng tshut-miâ ê sī tsîng Tâi-kiōng líng-sìu Siā Suat-hông tī Tâi-tiong ê 27 Pōo-tuī.
二二八事件的元兇
二二八事件佇台灣一直是袂使討論的題目,到1987年才有人敢公開討論,二二八事件的元兇嘛攏無人敢講。1987年二二八事件40周年,由鄭南榕、陳永興佮李勝雄等人所發起的二二八公義和平運動,二二八事件才會當公開討論,二二八事件的責任問題一直攏 無人敢講,佇1947年楊亮公佮何漢文的報告講事件是臺灣的暴民來造成的,公義和平運動推捒了後佇1992年行政院的二二八事件調查報告就無講是「暴民」 囉,2003年由財團法人二二八事件紀念基金會來做二二八事件的責任歸屬問題,根據公開的資料佮受難者家屬的採訪,佇2005年完成報告指出:二二八事件 的元兇(最大責任者)是國民政府主席蔣介石。
Jī-jī-pat Sū-kiānn ê guân-hiong
Jī-jī-pat Sū-kiānn tī Tâi-uân it-tit sī bē-sái thó-lūn ê tê-bok, kàu 1987 nî tsiah ū lâng kánn kong-khai thó-lūn. Jī-jī-pat Sū-kiānn ê guân-hiong mā lóng bô lâng kánn kóng. 1987 nî Jī-jī-pat Sū-kiānn 40 tsiu-nî, îu Tīnn Lâm-liông (鄭南榕) Tân Íng-hing(陳永興) kap Lí Sìng-iông(李勝雄) tíng lâng sóo huat-khì ê Jī-jī-pat Kong-gī-hô-pîng ūn-tòng, Jī-jī-pat Sū-kiānn tsiah ē-tàng kong-khai thó-lūn. Jī-jī-pat Sū-kiānn ê tsik-līm būn-tê it-tit lóng bô lâng kánn kóng. Tī 1947 nî Îunn Liàng-kong(揚亮公) kap Hô Hàn-bûn(何漢文) ê pò-kò kóng Sū-kiānn sī Tâi-uân ê po̍k-mîn lâi tsò-sîng ê. Kong-gī-hô-pîng ūn-tòng thui-sak liáu-āu tī 1992 nî Hîng-tsìng-īnn ê Jī-jī-pat Sū-kiānn tiâu-tsa pò-kò tsīu bô kóng sī 「po̍k-mîn」looh. 2003 nî îu Tsâi-thuân-huat-lîn Jī-jī-pat Sū-kiānn Kì-liām Ki-kim-huē lâi tsò Jī-jī-pat Sū-kiānn ê tsik-līm kui-siok bûn-tê. Kin-kú kong-khai ê tsu-liāu kap sīu-lān-tsiá ka-sio̍k ê tshái-hóng, Tī 2005 nî uân-sîng pò-kò tsí tshut: Jī-jī-pat Sū-kiānn ê guân-hiong (tsuè-tuā tsik-līm-tsiá) sī Kok-mîn-tsìng-hú Tsú-sik Tsíunn Kài-tsiō (蔣介石).
二二八事件的影響
根據李筱峰的研究,佇這擺事件之中,無論是政治交涉路線,抑是武裝抗爭路線,怹提出的訴求,干焦到高度自治爾爾,佇國家認同這勻,基本上猶原以大中國,並無臺灣獨立的要求,毋過,佇這擺的事件了後,因為國民黨政府全國的刣死真濟臺灣人,臺灣人佮中國人隔閡愈來愈深,臺灣人想欲追求家己一个獨立國家的想法,煞漸漸產生,會使講,二二八事件是臺灣獨立運動的起點,美國學者Meisner捌按呢表示:二二八這个詞,毋但是海外流亡的臺灣獨立團體的口號,而且是一个喚起所有臺灣人個人悲慘經驗的一个象徵,臺灣作家李喬嘛捌按呢表示:-
- 二二八事件是臺灣歷史頂懸,死傷上濟上悲慘,影響上大、上深的歷史事件,二二八已經變做臺灣人共同的惡夢,族群共同潛意識;臺灣人的意識、精神、情操、人間形象、人生理想、藝術創作、價值觀等等,攏隱隱包有二二八的因素在內。
- Jī-jī-pat Sū-kiānn ê íng-hióng
Kin-kù Lí Siáu-hong (李筱峰) ê gián-kìu, tī tsit-pái sū-kiānn tsi-tiong, bô-lūn sī tsìng-tī kau-sia̍p lōo-suànn, iah-sī bú-tsong khòng-tsing lōo-suànn, in thê-tshut ê sòo-kîu, ka-nā kàu Ko-tōo tsū-tī niā-niā. Tī kok-ka jīn-tông tsit-iân, ki-pún-siōng îu-guân í Tuā Tiong-kok, pīng-bô Tâi-uân To̍k-li̍p ê iau-kîu. M̄-koh, tī tsit-pái ê sū-kiānn liáu-āu, in-uì Kok-bîn-tóng tsìng-hú tsân-khok-ê thâi-sí tsin-tsē Tâi-uân-lâng, tâi-uân-lâng kap tiong-kok-lâng keh-hik na lâi na tshim. Tâi-uân-lâng sīunn-beh tui-kîu ka-kī tsi̍t-ê to̍k-li̍p kok-ka ê sīunn-huat, suah tsiām-tsiām sán-sing. Ē-sái kóng, Jī-jī-pat Sū-kiānn sī Tâi-uân to̍k-li̍p ūn-tōng ê khí-tiám. Bí-kok ha̍k-tsiá Meisner bat án-ne piáu-sī: "Jī-jī-pat tsit-ê sū, m̄-nā sī hái-guā lîu-bông ê Tâi-uân to̍k-li̍p thuân-thé ê kháu-hō, jī-tshiann sī tsi̍t-ê huàn-khí sóo-ū Tâi-uân-lâng kó-jîn pi-tshám king-giām ê tsi̍t-ê 象徵." Tâi-uân tsok-ka Lí Kiâu (李喬) mā bat án-ne piáu-sī:
Jī-jī-pat Sū-kiānn sī Tâi-uân li̍k-sú tíng-kuân, sí-siong siōng tsē siōng pī-tshám, íng-hióng siōng tuā, siōng tshim ê li̍k-sú sū-kiānn. Jī-jī-pat í-kīng piàn-tsò Tâi-uân-lâng kiōng-tông ê ok-bāng, tso̍k-kûn kiōng-tông ê tshiâm-ì-sik; Tâi-uân-lâng ê ì-sik, tsing-sîn, tsîng-tshò, jîn-kang hîng-siāng, jîn-sing lí-sióng, gē-su̍t tshòng-tsò, kè-ta̍t-kuan tíng-tíng, lóng ún-ún pau-ū Jī-jī-pat ê in-sòo tsāi-lāi.
二二八事件的受難者
- 林茂生
- 盧鈵欽
- 阮朝日
- 王育霖
- 王添灯
- 陳炘
- 陳澄波
- 張七郎
- 張宗仁
- 張果仁
- 湯德章
- 吳鴻麒
- 施江南
- 宋斐如
- 黃朝生
- 吳金鍊
- 高一生
- 徐春卿
- 陳屋
- 李仁貴
- 楊元丁
- 郭章垣
- 許錫謙
- 李瑞漢
- 林旭屏
- 林連宗
- 黃媽典
- 張榮宗
- 陳復志
- 潘木枝
- 蕭朝金
- 黃賜
- 王石定
- 葉秋木
- ....
- ....
* Lîm Bōo-sing
* Lôo Píng-khim
* Ńg Tiâu-ji̍t
* Ông Io̍k-lîm
* Ông Thiam-ting
* Tân Him
* Tân Tîng-pho
* Tiunn Tshit-lông
* Tiunn Tsong-jîn
* Tiunn Kó-jîn
* Thng Tik-tsiong
* Ngôo Hông-kî
* Si Kang-lâm
* Sòng Bûn-jû
* N̂g Tiâu-sing
* Ngôo Kim-liān
* Ko I̍t-sing
* Tshî Tshun-khing
* Tân Ó
* Lí Jîn-kuì
* Îunn Guân-ting
* Kué Tsiong-huân
* Khóo Siah-khiam
* Lí Suī-hàn
* Lîm hiok-pîn
* Lîm Liân-tsong
* N̂g Má-tián
* Tiunn Îng-tsong
* Tân Ho̍k-tsì
* Phuan Bo̍k-ki
* Siau Tiâu-kim
* N̂g Sù
* Ông Tsio-ting
* Iap Tshiu-bo̍k
...
改寫閩南語維基:Jī-jī-pat Sū-kiāⁿ 原作者:Pektiong, Chùn-hiàn, A-giâu, 無名氏, Luuva..等等
版權: CC-by-sa